Overblog Suivre ce blog
Editer l'article Administration Créer mon blog

Le p'tit conseil naturel

Widgecolo tout sur le bio

Publié par Omar Mouffok

K. Saci (El Watan, 13 Mayyuy, 2010)

* asteεfu

 

reghaia.jpgAgelmim n Rrγaya yesεa azal ur i tmurt-nneγ kan, wanag ula i tmura niḍen, imi d amkan aydeg tettjujjug tudert [d win aydeg d-ttasen yegḍaḍ iminigen akken ad εeccen ed ad frurxen, qbel ad ddun γer tmura niḍen], yerna d amkan igerrzen i wesgunfu.

I wakken ad tawḍem γer tḥarazt n ugama (réserve naturelle) n Rrγaya, yessekf ad taγem yiwen n webrid unniḍ, deg tlemmast n yimudaγ yeccuṛen d imγan, sakkin, mi tezzim kan tuzzya taneggarut, ad ken-id-iqabel unekcum n tḥarazt-nni.

Akken kan ara tekkem i tewwurt-nnes, ad d-tafem agama (nature) yettfejjijen seg ccbaḥa, d win aydeg ara yezhu lxaḍer n unerzaf. D win ay d agelmim n Rrγaya. Γef yiri azelmaḍ n ugelmim, tzemrem ad twalim aṭas n tnersa (débarcadrès), qrib ad dergent seg tuggta n yemγan ay d-imeγγin rrif waman, yerna γas akken imγan dlen kullec, nezmer ad nwali γer lbeεd igḍaḍ izedγen tama-nni mi ara ttafgen.

Γef yidis ayeffus, tzemrem ad tafem imukan ay d-yettuheyyan i yimerraḥen, ed yemγan aydeg thellan wid ay d-yelhan s wemkan-nni. D acu kan, γas ma yella kullec iṣeggem deg wefrag n ugelmim-a, ur llin waṭas n medden ay d-yettasen γer-s. Abrid ameqran n tḥarazt (réserve) n Rrγaya ur nwala yiwen itteddu deg-s, menγir kra kan n yiqeddacen ay d-yelhan ed wemkan-nni.

« Taḥarazt-a (réserve) tesεa aṭas n ttawil ay d-yettuheyyan i umager n yinerzafen. Dγa tzemrem ad tafem da inurar n wurar i yigerdan, tineγlusin (leqhawi), ikyuskyen akked yebduzen (toilettes) », ay aγ-d-yenna yiwen seg wid ay d-yelhan ed wemkan-a. Yuγ lḥal, imerraḥen, mi ara d-asen γer ugelmim n Rrγaya, zemren ad afen ayen ara swen deg lweqt aydeg ara zhun deg tmuγli n ccbaḥa n wemkan-nni, am wakken ay zemren ad ẓren igḍaḍ ay d-yettasen ad εeccen din, neγ ad qqimen γef yiγulad (bancs) n wesγar ay d-yettwaxedmen s ljedrat n yisekla (ttjuṛ).

Imerraḥen yebγan ad ffγen seg webrid-nni ameqran, zemren ad aγen tiberdatin (yettwafersen yagi i lmend n waya). « D tidet, taḥarazt n Rrγaya tettwaγleq kra n lweqt. Maca ass-a, lγaci qlilit imi seg melmi kan ay tules tettwaldey », ay aγ-d-yenna yiwen n uqeddac deg wemkan-nni.

Yuγ lḥal, taḥarazt n Rrγaya tella yettwassen seg zik d amkan n wesgunfu, yerna ass-a, iqeddacen-nnes ssaramen ad d-teqqel γer-s tudert, am zik, ladγa imi yella weḥric d ameqran seg wemkan-nni yettuheyya s ddema i yinerzafen kan.

D acu kan, tama-nni n yinerzafen tesεa tilisa, imi taḥarazt n Rrγaya tebḍa γef sin n yeḥricen yemgerraden. Aḥric n yinerzafen yettfaka deg yiwet n tewwurt, ur yessekf γef medden ad tt-kken, imi seg-in ay d-tbeddu tama aydeg ddren yerna ttεeccicen yegḍaḍ, yerna lemmer ad tt-kecmen medden, aya yezmer ad icewwel tudert n yegḍaḍ-nni.

Agelmim n Rrγaya d agerruj n ugama ay yessekf ad yettwaḥrez. Taḥarazt (réserve) n ugelmim-a ddren deg-s ugar n 200 n yegḍaḍ (ama seg wid yezgan deg Ldzayer neγ seg wid yettinigen), akked 233 n yemγan. Taḥarazt-a tesεa 550 yiqeṭṭaren n tjumma (superficie), deg-sen 150 n yiqeṭṭaren d aman.

Sγur K. Saci
Tasuqilt sγur Omar Mouffok:www.imedyazen.com

 

Commenter cet article