Overblog Suivre ce blog
Editer l'article Administration Créer mon blog

Le p'tit conseil naturel

Widgecolo tout sur le bio

Publié par Omar Mouffok

reghaia-copie-1.jpgSγur K. Saci
El Watan, 25 Mayyu, 2010

Agelmim n Rrγaya d amkan yesεan azal ameqran aṭas deg twennaḍt n Ldzayer, imi d netta ay d lateṛ aneggaru akk ay d-yeqqimen seg Uzaγar n Mettijet aqbur. Agelmim-a d netta ay d amkan yesεan aman awḥid deg tama n Ldzayer Tamaneγt aydeg mazal tudert tejjujjeg. D acu kan, deg yiseggasen-a ineggura, agelmim n Rrγaya iḥuza-t uxeṣṣar d ameqran, imi ay yeqqel d tamda wuγur d-ttemsegrawen waman yumsen n temdinin ed lluzinat n tama-a.

Kraḍ n yisafen ay d-yessawaḍen aman γer Ugelmim n Rrγaya, yerna akken ma llan umsen mliḥ : asif n Rrγaya, asif n Lebyar (El Biar) ed wasif n Buryaḥ (Boureah). Isafen-a ttawyen-d yid-sen akk ammus ay d-ssenγaren γer-sen yemdanen, ladγa asif-nni n Lebyar ay d-ilulen deg wasun amguran (zone industrielle) n Rwiba, yerna ittekk γef temdint n Rrγaya i wakken ad yaweḍ arma d agelmim-nni. Ammus ay d-ttawyen yisafen-a d win ay izemren ad yessenger tudert deg tḥarazt n ugama (réserve naturelle) n Rrγaya.

Yuγ lḥal, deg tama-nni tella yiwet n teγsart (station) n ussizdeg n waman (isem-nnes Step), d tin ay d-yelhan s ussizdeg n waman yumsen n wakk tiγiwanin n wegmuḍ (ccerq) n twilayt n Ldzayer, d acu kan, taγsart-a ur tessizdig aman n yisafen-nni ay d-nebder sufella-a. Taγsart-a d taṛmist (ccarika) n Vatech Wabag ay d-yelhan yid-s, yerna yiwen seg yemḍebbren-nnes yenna-aγ-d « aman ay d-itteffγen seg teγsart-a d izedganen 100% ». Wid ay netter dinna, nnan-aγ-d daγen aman ay ssizdigen deg teγsart-nsen ssenγalenè-ten γer ugelmim-nni, ladγa deg tallit n weẓγal, dγa s waya, aman-a ttekkayen deg ussenqes n wammus deg ugelmim.

Γef leḥsab n yemḍebbren n teγsart (station) n Step, ammus n ugelmim n Rrγaya yekka-d seg yisafen yellan « beṛṛa i ufus » n teγsart n ussizdeg. Γef leḥsab n yimazzayen (experts) ay netter, agelmim n Rrγaya ttawḍen-d γer-s, yal ass, 80.000 m3 n waman yumsen.

Yessekf ad d-nger tamawt agelmim n Rrγaya yezga-d deg wemkan anda isafen n tama-a ttawḍen γer yilel (lebḥeṛ), d acu kan, aman-nnes ur ttemlilin ed waman n yilil, imi ay tella yiwet n tesfift n yejdi ed yiwen n uḥebbas gar ugelmim n Rrγaya ed yilel Agrakal. Maca, nesḥissif imi tasfift-nni n yejdi rezzun-d fell-as yimakaren akken ad akren seg-s ijdi, yerna aḥebbas-nni n waman, ur yettwabna akken yessekf, yerna akken kan ara d-iwet cwiṭ n ugeffur, ad yeγli. Yuγ lḥal, aya yeḍra acḥal d tikkelt, deg yezri, yerna ahuddu n uḥebbas-nni d ayen yettajjan aman yumsen n ugelmim ad neγlen γer yilel, yerna d aya ay yessawḍen imḍebbren ad γelqen taftist n Qadus acḥal n yiseggasen γef wesref.

Seg tama niḍen, ammus n ugelmim n Rrγaya d ayen iḍurren ula d tafellaḥt yellan sdat-s. Yuγ lḥal, ifellaḥen sseqdacen aman yumsen n ugelmim-a i wakken ad sswen lγella-nsen, d acu kan, imi ay xelḍen deg-sen waman n lluzinat (aydeg llan wukfilen [métaux] imaẓayen) ay d-yettawey wasif n Lebyar, aya yezmer ad d-yeg aḍḍanen iweεṛen i yemdanen ara yeccen lγella-nni.

Tin yernan γer-s, assimes n ugelmim-a yettḍurru daγen imerrayen (touristes) ay d-yettasen ad t-ẓren. Yiwen seg yiberdan ay d-yessawaḍen γer ugelmim-a d win ay yeqqnen gar temdint n Hrawa ed tin n Rrγaya, yerna win ara yekken fell-as, ad yesriḥ rriḥa n dyiri. « Aḥric-nni n ugelmim d win wuγur d-yettaweḍ wasif n Buryaḥ, yerna asif-a yumes mliḥ. Yuγ lḥal, aḥric-nni ur telli deg-s tudert, imi aman ay d-yettasen seg wasif-nni ttgellilen din », ay aγ-d-yenna yiwen n umestekni n Vatech.

Deg tidet, yessekf d ssrabes n yimeswi (hydraulique) ara d-yelhun s yisafen-a ay la yessamasen yiwet seg tḥarazin (réserves) tineggura akk deg twilayt n Ldzayer, ladγa imi ugur-a ur yeqqin γer ssrabes n tγiwant.

Sγur K. Saci
El Watan, 25 Mayyu, 2010
Tasuqilt sγur Omar Mouffok www.imedyazen.com

Commenter cet article

ernest 28/07/2010 10:29



Dommage qu'il n' est pas traduit en français (ou tout au moins en avoir fait un résumé). Parmi vos lecteurs assidus et j'en fais partie, il y a aussi des Français.



Imddukal n Jeṛjeṛ 28/07/2010 17:44



Merci. Vous pouvez lire la version d'origine en cliquant sur le lien suivant:


http://www.elwatan.com/Lieu-de-detente-et-cynegetique-Le