Overblog Suivre ce blog
Editer l'article Administration Créer mon blog

Le p'tit conseil naturel

Widgecolo tout sur le bio

Publié par Omar Mouffok

Takessawt deg Tegzirin Tiknaṛiyin.

Sγur Néstor Bogajo

 

Amur ameqran seg yimezdaγen n Tegzirin Tiknaṛiyen n zik llan ddren s tkessawt n lmal. Yuγ lḥal, d takessawt ay yellan tettakf-asen-d amur ameqran seg wayen ttetten, γas ma yella llan daγen ttṣeyyiden iselman yerna ttekksen-d igumma (lfakya) seg ugama (nature). Ala deg tegzirt n Tamaran (Gran Canaria) ay tegget tfellaḥt, wanag deg tegzirin niḍen akk n urexbil aknaṛi, d takessawt ay yellan tesseccay madden.  

 

Iwanciyen (Iknaṛiyen n zik) llan kessen tiγeḍḍen, akraren akked yilfan, yerna llan sseqdacen akk ayen zemren seg tfekkiwin n yiγersiwen-a. Ttekksen-d seg-sen aksum akked uyefki (ayyes d-ttgen udi akked tkemmart [afeṛmaj]), am wakken ay d-ttekksen daγen seg-sen ayen ayyes d-ttgen tiγawsiwin ay sseqdacen deg tudert-nsen n yal ass-a (am yigelman, iγsan ed wustan).

 

Tiγeḍḍen  

 

Aṭas n lateṛ ay d-nufa γef tγeḍḍen deg Tegzirin Tiknaṛiyin, yerna aya yesskanay-d d nitenti ay d iγersiwen ay llan kessen Yiwanciyen s waṭas, zik-nni. Nnig waya, ula d inagan n zik ay d-yuran γef Yiwanciyen, nnan-d ineggura-a kessen aṭas n tγeḍḍen-d. Deg wedlis n « Le Canarien », nezmer ad nγer :  

 

« Deg tezgrit-nni [n Fuerteventura] llant aṭas n tγeḍḍen, yerna ad tent-tafeḍ ttuṛebbant neγ d tiweḥciyin, yerna seg wass-a d asawen, zemrent ad d-ttwaṭṭfent ugar n 30.000 yal aseggas, yerna ad yemmecc weksum-nsent, ed ad yettusseqdec weglim-nsent ed tassemt-nsent ; aksum n tγeḍḍen-a d azedgan, d aleqqaq yerna d aẓidan ugar n win n wakraren-nneγ » [Le Canarien – tizi n 1420]

 

Ar ass-a, imassanen ufan-d snat n ccetlat n tγeḍḍen ay llan kessen-tent Yiwanciyen: yiwet n ccetla tella tesεa acciwen mqaraben, nettat ur εlayet aṭas, timaẓẓagin-nnes d timecṭuḥin, yerna tella tezmer i tikli n waṭas akked ubeddel n wemkan ; ccetla niḍen n tγeḍḍen tella tesεa timaẓẓagin-nnes d timeqranin ugar, acciwen-nnes mfaraqen, yerna, γef wakken nettwali, llan kessen-tt Yiwanciyen ay izedγen γef yiri n yilel (lebḥeṛ), deg tnezduγin turkidin [Arco y Navarro, (1987) Los aborígenes. CCPC. (Historia Popular de Canarias, 1). 1996: 42].

 

Iwanciyen llan γγaren-asent i tγeḍḍen, s ujemmal, « aγaḍ », d acu kan, llan ttakfen ismawen yemgerraden i tγeḍḍen, γef leḥsab n tiddi-nsent (taille), γef leḥsab n leεmeṛ-nsent, n yiniten-nsent (llwan) neγ γef wayen niḍen [akken ay ttakfen Yeqbayliyen ismawen yemgerraden i tbexsisin, neγ, akken daγen ay ttaken Yimucaγ ismawen yemgerraden i yileγman, γef leḥsab n yiniten-nsen].

 

Ass-a, nessen deg Tegzirin Tiknaṛiyin kraḍ (3) n ccetlat n tγeḍḍen ay d-yefrurin seg tγeḍḍen-nni tineṣliyin n tegzrin-a qbel ad tent-id-kecmen Yespenyuliyen, d acu kan, ccetlat-a tiqburin, akken ma llant, negrent seg Teknaṛiyin. Snat n tγeḍḍen (ttwaselxent, sakkin sneṭḍen aglim-nsent γef yiqulab) nezmer ad tent-id-naf rsent deg Usalay Aknaṛi (El Museo Canario). Tiγeḍḍen-a kkant-d seg Caldera de Taburiente, deg tegzirt n La Palma. Yella daγen yiwen n uqelwac seg ccetla-a taqburt (ula d netta yettwaslex) ay nezmer ad t-naf deg Usalay n temdint n Funchal, deg tegzirin n Madeira (Portugal). Yuγ lḥal, γas ma yella tigzirin n Madeira ur llint deg-sent tγeḍḍen, zik, maca deg lqern wis XV, uwyen γer-sent Wuṛufiyen kra seg tγeḍḍen tiqburin n Tegzirin Tiknaṛiyin. Ccetla taqburt n tγeḍḍen tiknaṛiyin tessaweḍ ad tedder deg tegzirin n Madeira ar ass-a, ladγa deg snat n tegzirin timecṭuḥin n Las Desertas. D acu kan, γef wakken ay d-nnan Tejera ed Capote (* - 2005), adabu n Madeira la iεerreḍ amek ara yessenger tiγeḍḍen-a seg tegzirin-nni i wakken ad iḥudd yiwen n ṣṣenf n yegḍaḍ n yilel umi γγaren « Pterodroma feae ».

 

(*) Tejera Gaspar, Antonio, y Juan Capote Álvarez. 2005. Colón y La Gomera. La colonización de "La Isabela" (República Dominicana) con animales y plantas de Canarias. Tenerife: CCPC. (Taller de Historia).

 

Akraren

 

Idlisen ay d-yessawlen γef wakraren n Tegzirin Tiknaṛiyin, gren tamawt i yiwet n tγawsa ay d-ijebbden lwelha: akraren-a llan ur sεin aṭas n taḍuft ala deg tseḍḍa. Yuγ lḥal, llan ttbanen-d amzun ttwallsen, yerna, war ccek, aṭas seg yibeṛṛaniyen ay ten-yeẓran, zik, γilen, ahat, d tiγeḍḍen. Yezmer lḥal, kra seg wid ay d-yuran γef Tegzirin Tiknaṛiyin n zik, nnan-d ẓran ala tiγeḍḍen deg kra seg tegzirin-a, yili, ahat, ad ilin ẓran ula d akraren, maca imi ur sεin taḍuft (am wid n Tuṛuft), imeskaren-a (auteurs) ḥesben-ten d tiγeḍḍen. D acu kan, Juan de Abreu Galindo ur d-yeγli deg tefxet-a asmi ay yura adlis-nnes n Historia:

 

« Deg tegzirt-nni, ttṛebbin tiγeḍḍen akked yiwet n ccetla n wakraren ur nesεi taḍuft, wanag sεan cceεṛ d alewwaγ am win n tγeḍḍen, yerna d imeqranen; …” [Abreu (ca. 1590, III, 1) 1977: 261].

 

Ccetla-a n wakraren tella tettcabah akraren icaεen deg Tefriqt n Ugafa. S waya, yezmer lḥal akrar n Tegzirin Tiknaṛiyin ad yili yekka-d seg ccetla n wekrar aqbur n Tefriqt n Ugafa (Ovis palaeoegyptiaca), yerna ccetla-a taneggarut mazal-itt ar ass-a tella deg tmiwa n Ssaḥel (seg Ityupya arma d Muriṭanya). [Meco Cabrera, Joaquín. 1992. Los ovicaprinos paleocanarios de Villaverde. Diseño paleoontológico y marco paleoambiental. Tenerife: Dirección General de Patrimonio Histórico del Gobierno de Canarias.]

 

Iwanciyen iqburen llan sseqdacen aṭas n wawalen i wekrar : deg Tenerife, lla, γγaren-as “haña” (hanza) ; deg Tamaran

(Gran Canaria), γγaren-as “tahatan”, yerna akraren-nni ur nesεi taḍuft, γγaren-asen « aridaman ». Isem-a aneggaru yejbed-d lwelha-nneγ imi ula deg tmaceγt n Nijir ed Mali, akrar ur nesεi taḍuft γγaren-as « idaman ».

 

Nnig waya, ula deg tespenyulit ay ssawalen, ass-a, Yeknaṛiyen, ggran-d aṭas n yismawen imaziγen n wekrar, d ismawen yettemgerraden γef leḥsab n ṣṣifa n wekrar-nni, akken yella lḥal, daγen, akked tγeḍḍen. Γef umedya, deg tegzirt n El Hierro, « ambracafiranca » neγ « ambracasaca » d ismawen ay ttakfen i wakraren γef leḥsab n yiniten-nsen (llwan). Deg tespenyulit n tegzirt n Tenerife, akrar γγaren-as daγen “ara” neγ “hara” [d awal iqerben γer akrar]. Awalen-a ay d-yeggran deg tespenyulit n Teknaṛiyin sskanayen-d azal ay yella yesεa-t wekrar deg tudert n yal ass γer Yeknaṛiyen.

 

Ilfan

 

Anadi asenzik (archéologique) yufa-d lateṛ n tkessawt n yilfan deg wakk Tigzirin Tiknaṛiyin. Nnig waya, llan ula d imeskaren (auteurs) iqburen ay d-yuran Iknaṛiyen yellan ttbeddilen imukan-nsen n tnezduγt, llan ttawyen yid-sen ula d ilfan. D acu kan, ile fur yesεi azal ameqran, deg tudert n Yeknaṛiyen, akken ay t-sεan wakraren akked tγeḍḍen.

 

Ar ass-a, werεad nessin amur ameqran seg ccetlat n yilfan ay llan kessen-tent Yeknaṛiyen iqburen. Ma neqqel γer yedlisen iqburen, ad naf Iknaṛiyen n tegzirt n Tamaran (Gran Canaria) llan kessen ilfan d imellalen, ma d ilfan n La Palma, sεan initen (llwan) ixelḍen. Ma deg tama n Icod (deg tegzirt n Tenerife), imassanen ufan-d iγsan ed lateṛ n yilfan n tẓegwa, deg wakud aydeg deg tama n Guayadeque (deg Tamaran), ufan-d yiwet n ccetla n yilfan n Yilel Agrakal, texleḍ gar ccetlat n Asya ed tid n Tuṛuft [Arco Aguilar, Mª del Carmen del, y Juan Francisco Navarro Mederos. 1996 (1987). Los aborígenes. CCPC. (Historia Popular de Canarias, 1).]

 

Ilfan iqburen n Tegzirin Tiknaṛiyin (wid yettwassnen qbel ad d-kecmen Yespenyuliyen), qqimen tteddren gar yemdanen ed tẓegwa arma ay d lqern wis 20 deg tegzirin n El Hierro ed La Gomera. Iγersiwen-a llan “sεan timeγlin [uglan ay d-itteffγen seg yimi n yilef] yerna aglim-nsen d aberkan. D lateṛ seg yilef-nni aqbur aneṣli ay d-yeggran, deg tezwara n yiseggasen n 1980, deg tegzirt n La Palma”. (Tejera y Capote 2005: 47).

 

Iwanciyen sεan aṭas n yismawen ayyes γγaren i yilef. Isem yettwassnen deg qrib akk tintalyin (dialects) tiknaṛiyin netta d “ilfe” (ilef), d win ay d-nufa ama deg tegzirt n Fuerteventura, ama deg Tamaran (Gran Canaria) neγ deg Lanzarote. Deg Tamaran, yella daγen wawal ‘taquazen’ (taghazzènt [war ccek yekka-d seg wemyag « eγz »), d amaγun unti (participe féminin) yeqqnen γer unamek n “ufettec”, imi ilef “yettfettic” akal.

 

Deg tgara, yessekf ad d-nesmekti dduṛ ay yella yetturar-it uγersiw-a deg tudert n yimezdaγen ineṣliyen n tegzirt n El Hierro. Imezdaγen-a llan γγaren-as i yilef “aranfaybo” (neγ aramfayboz), neγ “win ay d-yesseγlayen ageffur”, yerna, asmi ara iεeḍḍel ugeffur akken ad d-iwet, llan ttaznen argaz yesεan amkan imqeddes γer-sen, ad yeddu γer wesgen n yilef, deg teẓgi, akken ad t-yetter ad as-yini i uyuc (divinité) ad ifak fell-asen tallit-nni n takewt.

 

Sγur Néstor Bogajo

Tasuqilt : Omar Mouffok (Tiddukla Tadelsant Imedyazen – www.imedyazen.com)

Taγbalut: http://www.mundoguanche.com/portada/articulo.php?id_articulo=134&idtipo=28&id=11

 

 

 

 

 

  

Commenter cet article

clovis simard 01/11/2010 14:45



Bonjour,


Vous êtes invité à visiter mon Blog.


Mon Blog présente une nouvelle théorie mathématique de la conscience: LE CODE D'EINSTEIN, Plus spécifiquement la page:CHAMPLAIN-GHOST.NERON,HISTOIRE(fermaton.over-blog.com) et
celle:LOTO-GORILLES-ADN:HASARD.
Par la présente, j'aimerais si vous le voulez bien que les gens  de votre communauté me fassent parvenir des commentaires.


            Cordialement


            Clovis Simard